Ilaquttat amerlanerpassuartigut tassaasarput qaniginerpaasavut. Kisianni aappatsinnut, qitornatsinnut, angajoqqaatsinnut qatanngutsitsinnullu asanninnerput suut tamarmik narlumut ingerlanissaannut ajoraluartumik qularnaveeqqutaaneq ajorpoq.
Suliffeqarfimmik ingerlatsisut marluk suliffeqarfiup ingerlanneranik sammivianilluunniit isumaqatigiinngilersinnaanerattulli, aamma ilaqutariit akornanni annertuunik – ilaanni qaangigassanngitsunik – isumaqatigiinngittoqalersinnaasarpoq. Avinnerni kingornussassalerinermilu taamaalisoqartarnera takusaannarparput.
Aporaanneq sakkortusiartortarpoq illuatungeriillu tamarmik uteriartitassaasaratik. Naaperiaasitsineq isumatusaarnerlu aaqqiisinnaanngippata taava inatsisit saaffigisariaqalersarput – misigissutsikkut annersitaanernut naatsorsuutigisaraluanillu pissarsinngitsoornermut illuatungiliuttuullutik inatsisit isumatuumik isiginninniarfiusarput. Aaqqiagiinnginneq ima sakkortutigilersimappat illuatungeriit isumatuumik oqaloqatigiissinnaajunnaarsimallutik, taava advokat misilittagartooq siunnersuisinnaavoq – immaqalu – oqaloqatigiisitseqqilersinaalluni, imaluunniit eqqartuussivilersuussisoqalersimappat ikiuussinnaalluni. Advokat Charlotte Pedersen isumaqatigiissaasutut ilinniarsimasuuvoq taamalu aaqqiagiinnginnernik aaqqiiniarnissamut suliatigut atuagarsornikkullu tunngavissaqarluni.
Aaqqiagiinnginnerit taaneqartutut pissusillit torersumik aaqqinneqarnissaat kaammattuutigiuaannarparput – pitsaanerpaajusarporlu tamakku pinaveersaartinniarlugit piffissaalluartillugu qanoq iliuuseqartoqarsimappat soorlu aappariinnermut isumaqatigiissummik aamma / imaluunniit kingornussisussanik aalajangersakkamik suliaqartoqarsimappat. Tassami katinnermi suliassani taanna suliassani soqutiginarnerpaajunngikkaluartoq taamaattoq peqatigiinnerup pitsaagallarnerani aalajangiigassat tamakku aalajangissallugit pitsaanerpaajusarpoq.
Aappariinnermi isumaqatigiissummik, kingornussisussanik aalajangersakkamik, pigisat agguaanneqarnissaannik isumaqatigiissummik allanillu eqqarsaatigisassaararpassuit eqqumaffigineqarnissaannik misilittagaqarluarpugut.
Siunnersuinitsinni siunertaraarput assersuutigalugu aappariinnerup kingorna imaluunniit ilaquttat arlaata toqukkut qimagunnerani aaqqiagiinnginnerit imaluunniit nalornissutaasut pinaveersaarniarlugit aaqqereerniarlugilluunniit malitassanik erseqqissunik nalunaarsorsimasunillu tunissallusi.
Suliffeqarfimmik ilaqutariinni ingerlatitseqqinneq
Suliffeqarfiit ilaqutariinni ingerlateqqinniarneqassappat ilaqutariinnermut kingornussisarnermullu inatsisinut tunngasut oqimaalutaqqissaarnissaat pinngitsoorneqarsinnaanngilaq.
Suliffeqarfiit ilaqutariinni ingerlateqqinneqarneranni siunnersuinermut misilittagaqaqaagut suliffeqarfik iluatsittumik ilaqqutanit nanginneqassappat aappariinneq pillugu isumaqatigiissusiornerup kingornussisussanillu aalajangersaanerup pisariaqarneranik qulaajaanermut misilittagaqarluarpugut.
Ilaqutariinnermut kiisalu kingornussisarnermut taavalu suliffeqarfiit ilaqutariinni ingerlateqqinneqarnerannut inatsisitigut sukumiinerusumik paasisaqarumagaani attavissat tassaapput advokat Charlotte Pedersen imaluunniit advokat Kista Høegh Niclasen.
