TUSAGASSIORTUTIGUT NALUNAARUT
TV2-kkut aallakaatitassiami piviusulersaarummi ”Den sorte svane” eqqartuussissuserisumit Nicolai Dyhrimit, Hortenimi piginneqataasimasumit, oqaaseqaatigineqartunut Nuna Advokatit akuersaanngilluinnarput.
Nuna Advokatit Horten Advokatpartnerselskab suleqatigaat, suleqatigiinnerlu 20 procentinik piginneqataaffigalugu suleqatigiipput, Nuna Advokatit suliani immikkut ittuni immikkut ilisimasalinnik atuisinnaallutik. Suleqatigiinnermi piginneqataaffiup suliffeqarfiullu, Hortenimit piginneqataaffigineqanngitsup, piginnittui attuumassuteqanngillat.
Ulluinnarni sulinitsinnut siunnersuisarnitsinnullu Horten attuumassuteqanngillat suleriusitsinnullu attuumassuteqaratik. Nuna Advokatit aamma Horten suliffeqarfiit inatsisilerinermut tunngasunik suliaqartut immikkoorput, paasissutissanillu ingerlaavartunik paarlaasseqatigiittoqarneq ajorpoq. Nuna Advokatini sullitanut tatiginartumik ingerlatseriaatsit sukannersut atorlugit ingerlanneqartarput, eqqartuussissuserisutullu ileqqorissaarnermut malittarisassat naapertorlugit sullitatta akuersissutigeqqaartarpaat Hortenimit suleqateqarnissaq sulianut aalajangersimasunut ilanngunneqassappata. Taamaattumillu suliat sullitagut akuersiteqqaartinnagit Hortenimi immikkut ilisimasalinnut ingerlateqqinneqarneq ajorput.
Pineqartoq eqqartuussissuserisoq Nicolai Dyhr Qallunaat Nunaanni suliffeqarfiit akiliisinnaajunnaartut pillugit suliat ingerlatarai, Nuna Advokatinilu sulianik suleqataanikuunngisaannarpoq. Nuna Advokatiniit ilisimaneqanngilaq Nicolai Dyhr sulianik Kalaallit Nunaannut tunngasunik suliaqarnikuunersoq.
Eqqartuussissuserisoq Nicolai Dyhrip oqaaseqaatai taassumalu sulinerminut atatillugu periusai eqqartuussissuserisutut sulinermut naleqqutinngilluinnartut Nuna Advokatini piginneqataasut tamarmik akuersaarfiginngilluinnarpaat. Tassunga atatillugu maluginiarparput Hortenimi aamma akuersaanngitsut, Hortenimi eqqartuussissuserisutut piginneqataasutullu sulinermut pissusilersuutigineqartut tulluanngimmata. Taamaattumillu sapaatit-akunneri arlallit siulianni pisup kingunerisaanik piaartumik Hortenip soraarsippaat kingornalu iluminni misissuillutik aallartipput. Horten Qallunaat Nunaanni eqqartuussissuserisutut suliffeqarfiit anginersaat ilagaat, suliaminnullu pikkorissutsimikkut kiisalu ileqqorissaartuunerisigut nalunnginneqarluartuullutik.
Nuna Advokatit naammagisimaarpaat Advokatsamfundimit eqqartuussissuserisut oqartussaanerannik nakkutilliisunit, eqqartuussissuserisut pineqartut piaartumik misissuiffigineqarmata.
Oqaaseqaatigineqartut eqqartuussissuserisutut sulinermi naleqqutinngillat, naatsorsuutigaarpullu Advokatsamfundip Advokatnævn-i ilanngutitissagaat. Taakku eqqartuussissuserisunut pineqaatissiillunilu eqqartuussissuserisut allagartaat arsaarinnissutigisinnaavaat.
Thor Suhr Peter Schriver Helen Kibsgaard Charlotte Pedersen Kista Høegh Niclasen