Coronavirus nunatsinni suliffeqarfinnut amerlasuunut suliakillisimaqisunut aningaasatigut assut ilungersunartorsiortitsivoq. Tamatuma peqatigisaanik sulisut amerlasuut soraarsinneqarunik suliffimminnik annaasaqaratarsinnaapput pilersornissaminnullu tunngavissaaruteratarsinnaallutik.
Nunatsinni inuussutissarsiortut sulisullu tapersersorumallugit Naalakkersuisut pingasunik ikiorsiissuteqarput; inuussutissarsiortunut ikiorsiissutit marluk kiisalu sulisunut ikiorsiissutit ataatsit.
Inuussutissarsiortunut ikiorsiissutit – nukinginnartumik ikiorsisisutit kiisalu ikiorsiissutit nalinginnaanerusut
Nukinginnartumik ikiorsiissutit suliffeqarfinnut namminersortunut, tassa akunnittarfinnut, neriniartarfinnut kiisalu sullissinerit ilaannut assigisaannullu ikiorsiissutaapput. Ulloq manna tikillugu nukinginnartumik ikiorsiinermut 50 mio. kr.-it illuartinneqarsimapput.
Ikiorsiissutit nalinginnaasut suliassaqarfinni allani aningaasatigut ajornartorsiutinik pinngitsoortitsiniutaassapput, soorlu aalisarnermi, sanaartornermi, assartuinermi allanilu. Maannamut ikiorsiissutinut nalinginnaasunut 100 mio. kr.-it immikkoortinneqarsimapput.
Suliffeqarfiit namminersortut nunatsinni nalunaarsimasut tamarmik pineqarput, suliffeqarfiillu sulisuisa amerlanersaat nunatsinni najugaqartussaallutik.
Qinnuteqassagaani suliffeqarfimmi kaaviiaartitat il.il. minnerpaamik 30%-imik annaasaqaataasimasussaapput.
Sulisunut ikiorsiissutit (suliffeqarfiit namminersortut akissarsisitsinerannut matussutissat)
Nunatsinni sulisut coronavirus pissutigalugu soraarsinnagit angerlartineqarsimasut akissarsiaannut matussutissat 107 mio. kr. immikkoortinneqarsimapput.
Qinnuteqassagaani sulisut ikinnerpaamik 30%-ii imaluunniit 25-init amerlanerusut soraarsinnissaannik ilimasaarneqarsimasariaqarput.
Akissarsianut matussutissat 30. juni 2020 ilanngullugu qaammatini pingasuni tunniunneqarsinnaaput.
Qanoq qinnuteqartoqarsinnaava?
Nukinginnartumik ikiorsiissutit ikiorsiissutillu nalinginnaasut Greenland Businessimit aqunneqarput. Ullumi 23. marts 2020 nal. 12:00 qinnuteqarnissamut ammaassisoqarpoq.
Qinnuteqaatit apeqqutaajunnartullu una aqqutigalugu Greenland Businessimut ingerlatinneqassapput: https://www.innovation.gl/stoetteordninger/mine-ansoegninger/. Tassanissaaq itinerusumik atuarneqarsinnaavoq qinnuteqarneq qanoq ingerlasarnersoq.
Sulisunut ikiorsiissutit akileraartarnermik aqutsisoqarfimmit aqunneqarput uanilu qinnutigineqarsinnaallutik: https://www.sullissivik.gl/Forms/Ansogning-om-midlertidig-lonkompensation-for-lonmodtagere-pa-det-private-arbejdsmarked?sc_lang=da-DK&mupid=Sermersooq.
Ikiorsiissutini atugassarititaasut sukumiinerusut www.big.gl-imi takuneqarsinnaapput kiisalu paasissutissaasivimmi uani nassaassaasumi: https://www.businessingreenland.gl/~/media/Erhverv/COVID-19/Faktaark_hj%C3%A6lpepakker_DK_2020-03-21.pdf?la=da.
Iliuutsit allat – akileraarutinik akitsuutinillu akiliiffissanik kinguartitsineq kiisalu naalagaaffimmiit qularnaveeqqutit.
Taakku saniatigut Naalakkersuisut ikiorsiissuteqarput coronavirusimik nalaataqarnermik inuussutissarsiortut qaangiiniarneranni iluaqutaasinnaasunik. Akileraarutit akitsuutillu il.il. akilernissaannut piffissaliussanik sivitsuinissamut Naalakkersuisut piginnaatinneqarput.
Nunatsinni suliffeqarfiittaaq akiliisinnaassutsiminnut tapertaasumik naalagaaffiup qularnaveeqqusiineranut ilaasinnaapput. Taanna Vækstfondeminit aqunneqarpoq. Qinnuteqaatit apeqqutaajunnartullu uunga nassiunneqassapput: https://vf.dk/covid-19/
Nuna Advokater ikiorsiissutinut tunngasutigut siunnersuinissamut, ikiuunnissamut ilitsersuinissamullu piareersimapput.
Peter Schriver
Piginneqataasoq, Advokat
(+299) 55 79 22
ps@nuna-law.gl
Kista Høegh Niclasen
Advokat
(+299) 48 23 70
kh@nuna-law.gl